DI UJI SETAN

HARI Ahad tadi Palui wan bininya disaru ulih Julak Tambun. Sidin basalamatan mangawinakan kamanakan sidin. Karna Tulamak laki bini wan Garbus laki bini disaru jua, maka bubuhannya bajanji handak baimbai tulakan.
"Sidin manyaru ini sakaligus handak mangumpulakan samunyaan kaluarga dan handak bacuur kancur jarangaunya, karna makin kabawah hubungan kaluarga kita ini makin jauh," ujar Garbus.

"Aku satuju Bus ai. Biasanya hubungan kaluarga itu hanyar dikatahui ada kancur jarangaunya bila sudah tajadi bakalahian, batamparan atawa basudukan" ujar Palui.

"Tulamak dihabari supaya kita tulak baimbai," ujar Garbus.

"Hiih, Tulamak sudah jua kuhabari dan kaina kusinggahi. Tapi biniku kada kawa umpat Bus ai karna inya gagaringan," ujar Palui, lalu inya langsung ka rumah Tulamak mambawai baimbai.

"Uuuii Tulamak, sudah siapkah kita tulakan saruan" ujar Palui.

"Abahnya kadada di rumah, inya tulak ka pasar manukar umpan hayam," ujar bini Tulamak manyahut matan dalam rumah.

"Umpat kalu saruan ka rumah julak Tambun?" ujar Palui.

"Tadi abahnya sudah jua bapasan bubuhan ikam tulak haja badahulu Lui ai. Abahnya takutan kalu pina kasiangan bila mahadangi inya bulik matan pasar," ujar bini Tulamak manyahut matan dalam rumah sambil asyik badandan-dandan.

Kada lawas imbah bapander itu kadangaran suara bini Tulamak gagarunum: "Bangsat tajarat mati pulang........ sudah biasa bila badadas pasti macam-acam haja," ujar bini Tulamak.

"Ikam mamamai siapa bini Tulamak?" ujar Palui manyahut karna takutan dikira inya nang disalahakan.

"Ini nah, tali kutang-ku tajarat mati, ngalih dipacul padahal aku handak baganti kutang," ujar bini Tulamak.

"Basabar haja bini Tulamak ai, pacul bagamat" sahut Palui.

"Ngalih banar, pisit banar jaratannya. Tulung Lui, tulung paculakan, bila kada kawa dipacul langsung ditatak haja," ujar bini Tulamak minta tulung sakaligus manyuruh Palui masuk ka kamarnya.

"Aku takutan kalu abahnya salah manyangka," ujar Palui pina supan-supan sambil dalam hatinya baucap: "Diuji setan aku. Apalagi bini Tulamak ini dahulunya bakas gandak-ku," ujar Palui dalam hati.

"Masuk ja, kada apa-apa kalu cuma tajapai sadikit haja asal jangan singhaja mamusut-musut," ujar bini Tulamak pina lanji marayu.

"Lamak mungkal pina bulat kaya Tulamak jua, mancarunung bini kawan, mudahan kuat imanku, mudahan kuat imanku" ujar Palui dalam hati sambil gitir-gitir bagamat masuk