Halal Haram Wan Maharamakan

Sabtu, 19 Desember 2009 | 01:30 WITA

"Mulai matan tadi ikam kuitihi pina bingung, kanapa Lui?" ujar Garbus marawa Palui.
"Sabujurnya aku kada bingung Bu sai, cuma aku lagi bapikir," ujar Palui.

"Napa nang dipikirakan, jangan ngalih-ngalih bapikir. Bapikir itu urusan abah-abah kita di atas sana," ujar Garbus.

"Kalu urusan nagara, urusan pamarintahan atawa urusan adanya dairah nang handak mardika itu bujur haja urusan bubuhan urang atas sana. Tapi ini urusan parut, urusan halal wan haram taumpat jua jadi pikiran kita," ujar Palui.

"Kita urang bawah ini Mak ai, kada sampai ka sana utaknya mamikirakan. Nang kita pikirakan adalah kaya apa supaya kawa manukar wan kawa mamakannya," ujar Garbus.

"Tapi aku makin bingung jua Mak ai, mula-mula dipadahakan haram tapi ada pulang nang mamadahakan halal. Lalu mana nang bujur wan mana nang harus diumpati?" ujar Palui.

"Kalu sual itu kada cuma ikam saurangan nang bingung, tapi sabanuaan bingung," ujar Garbus.

"Jadi kalu kaya itu artinya pamimpin kitalah nang maulah kita bingung," ujar Tulamak.

"Nang maulah kita bingung itu adalah prupukatur," ujar Palui.

"Aku sapakat wan pandapat ikam itu Lui ai, lantaran kalu sudah disambat ada prupukaturnya pasti kada cagar dapat siapa urangnya," ujar Garbus.

"Dahulu aku biasa jua bingung Bus ai, bahwa di banua kita ini ada jua urang nang maharamakan hayam, jadi kada cuma babi nang diharamakan. Tapi nyatanya biar diharamakan tatap haja dimakan sampai wayahini," ujar Palui sambil lihum takarinyum.

"Ikam ini macam-macam haja Lui ai, siapa ulamanya nang maharamakan hayam?" ujar Tulamak pina sarik.

"Sabar, sabar Mak, jangan mancari urangnya atawa ulamanya. Aku sapandapat wan Palui bahwa bubuhan warga kita di pahuluan samunyaan maharamakan hayam," ujar Garbus mambujurakan pandapat Palui.

"Kalu hayam kada diharamakan pasti cagar tambuk hintalunya," ujar Palui.

"Aku paham, aku paham Lui ai," ujar Tulamak mangalakak tatawa saurangan.